عراقي قدم طلب لجوء الى مملكة الحيوانات ورفضوه ! تعالوا وشوفو‏

تصدگون عراقي قدم طلب لجوء الى مملكة الحيوانات ورفضوه ! تعالوا وشوفوا:
گمت من الصبح ورحت ده أغسل وجهي مثل ما تسوي كل البشر لگيت المي مگطوع وطبعا' الكهرباء همينه مگطوعة ..
رحت للمطبخ وسألت المرة : وين الريوگ ؟ گالت ماكو ..
روح أتريك لفة بأي مطعم على طريقك ..
گلتلها يا مرة ما ده تشوفين أنو المطاعم هم صارت مستهدفة وبالذات وكت الريوگ ..
چان تباوع عليه وما حچت بس أني من عشرتي الطويلة وياها عرفت شتقصد ..
نظرتها تگول : عاد أنت مو أحسن من اللي ده يموتون ..!!
عفت البيت ومشيت وظليت أفكر بالعيشة والظروف .. يا ربي شلون .. وين أولي وين أروح ؟ أروح أهاجر لبره ! بس أني شنو مؤهلاتي وين فلوسي وبعدين شراح أسوي بجهالي ! ما أتصور أكو دولة راح تقبلني ..
قابل أني أحسن من هالناس اللي صارله تنتظر سنين .. ظليت أمشي وأفكر وچان تطخ ببالي فكرة .. فكرة تازة ولا عراقي مفكر بيها ..
ليش ما أروح أقدم طلب هجرة لمملكة الحيوانات والله الحيوانات أحسن من عدنا أحنا البشر أكيد راح يتعاطفون وياي ويقبلون طلبي ..
رحت وحتى لا أطولها گبل چفتت على الملك ..أقصد طبعا' على الأسد ..
ذبيت روحي عليه وگتله يا سيادة الملك أني عراقي جاي عدكم دخيل وأريد أصير واحد منكم ..
أني زهكت من البشر وكرهتهم ويا ريت تتعطفون علي وتقبلون طلب لجوئي لمملكتكم ..
چان يباوع عليه الأسد وبكل هدوء گال قدم طلب وراح ندرسه ونشوف ..
قدمت بسرعة الطلب وشرحت ظروفي وظروف البلد ..(وأنتظرت يوم يومين وأجاني الرد ( طلبك مرفوض ) ..
شنو مرفوض ؟!! مستحيل !! صرخت وعاندت وگلت لازم أعرف السبب .. گال الأسد الحيوانات كلها رفضت وجودك وقررت رفض الطلب
گلت ما أصدك أني مصر أسمع رأي الحيوانات شخصيا' حتى أگطع الأمل نهائيا'....
گال الأسد ماشي باچر تجي وتسمع بنفسك ..
ثاني يوم جيت وبسرعة على الملك طبيت لگيته گاعد ومهيأ الأجتماع والحيوانات كلها گاعدة تنتظر دورها للكلام ..
فرحت بهاي البداية لأن الحيوانات مهتمة بيه هوايه ..
وگال الأسد هسه راح تسمع رأي الحيوانات وحضر نفسك للأجابات ..

أجى أول الحيوانات وكف گدامي .. الحمار ..
ما أدري ليش أختارو الحمار بالبداية يمكن لأن هو أكثر الحيوانات اللي مهضوم من عدنا أحنا العراقيين ..
باوع الحمار علي وگال لو تدري شگد أحنا الحمير حاقدين عليكم أنتو العراقيين ..
ما تگلي شنو ناقصكم حتى تظلون معتمدين علينا ...ناقصكم نفط لو فلوس ؟
بالله مو عيب عليكم تتسمون دولة نفطية والى هسه معتمدين عليه ؟
كل الحمير بالبلدان تحررت من العبودية وأنتو زودت علينا حمل العبودية .. ما كافي نجر عربانات النفط والغاز بشوارعكم وعربانات الخضرة بأسواقكم أنوب گمنا نجر عربانات جرحاكم وقتلاكم...!!!
ما تگولي الى أمتى نبقى بهالعبودية ؟ خجلت من نفسي وما گدرت أحچي كلمة ..بس تمتمت وگلت حقك عيوني حقك ..!!!
وسكتت وگلت بيني وبين نفسي هذا الحمار هيچ سوى بيه لعد الله يساعدني عالبقية ..!!؟
راح الحمار وأجا الثور وگف وگال أني بس أسألك سؤال ..
گتله تفضل حضرة الثور ..
گال أنتو مو عدكم مثل يكول ( أخذ الشور من راس الثور ) گتله أي عدنا ..
گال لعد شبيكم ما تشوروني ..شفتو شوركم وين وصلكم من هملتوني ..
حيل بيكم ..!!..
رديت وگلت أي والله حيل بينا .
وراها أجا الحصان وگف ومثل الشاعر من يلقي قصيدة گال :
أني أني \ كنت رمز القوة والفروسية وأنتو العراقيين سويتوني رمز للمنتوجات النفطية ..
أني أني كان يقودني النشامى هسه يقودوني عربنجية .. ..
رديت أي والله ..

وراها جتي مجموعة بلابل وعصافير وگالت بالله عليك أمتى كانت أخر مرة سمعت بيها تغريدنا ؟
گلت والله ما أتذكر أني من زمان أنام وأصحى على صوت تفجيرات وطلقات نارية
جاوبتني البلابل وگالت وجاي ترمي علينا هاي البلية أحنا ما صدكنا رجع صوتنا وشفنا الحرية .. !!؟؟؟
بالله عليك أبتعد وخلينا نغرد ونغني أحنا ما نحب النوح واللطمية ..
گلت بحزن والله أني هم ما أحبها بس هي مفروضة عليه ..
وراها جتني سمچة مبين حيل مقهورة من عدنا وكالت بعصبية أني ما كاتلني غير مثلكم اللي يكول
( السمج الكبير ياكل السمج الصغير ) عاد أنتو شلونكم فدوة أبد ما عدكم شهية ..!!!
وراحت تسبح وگلت بقلبي لا هواية حصلت على الموافقة أذا حتى السمچة اللي ما عدها گلب شايلة بگلبها علينا ..
وراها جتي چم غزالة ومها ..
عيني شلون رشاقة وشلون عيون گلت ويه نفسي هذني رقيقات وأكيد راح يتعاطفن وياي ..
باوعت غزال عليه بدلع وگالت بصراحة أحنا راس مالنا جمالنا ..
رديت والنعم .. وگالت
فرجاء أحنا ما نريد ثقافتكم .. جاوبتها ليش عيوني أنت ليش ..؟؟؟
شبيها ثقافتنا مو أحنا اللي غنينالج ( غزال وما يصيدونه ) مو أحنا اللي كتبنا لعيونچ القصايد نسيت قصيدة عيون المها ... شتردن بعد؟.. چان ترد أحنا نقصد ثقافتكم الجديدة مو القديمة أحنا ما نريد أحد يلفنا وبقطعة قماش يغطينا مثل ما تسوون أنتو بأناثكم .. أناثنا هن وينهن أناثنا أشو كاضياتها سواد بسواد ولطم ونواح ..هم الله يساعدهن ..
وراها أجا الچلب وكف كدامي ووجهه چان كلش جديات وگال بصراحة أني خايف على الأجيال مالتنا ..
گلت أجيال ..؟؟؟؟
أشو گام يحچي فصيح .. الله يستر .. گلت وضح عيوني ..
گال أي أحنا الچلاب معروفين بالوفاء وما عدنا غدر وخيانة وأنتو العراقيين يعني بلا زعل تخونون أمكم وأبوكم وأني خايف على أخلاق الجراوة مالتنا تروح تنحط وتصير مثل أخلاقكم ..!!!!
غير أستحيت من نفسي گلت أيباااااه حتى الچلاب گامت تستنكف من عدنا .. شگد عيب ..

وراها أجا القرد وكف گدامي وخله أيده على حلگه وضحك وگال :
سلملي على اللي بالمنطقة الخضراء ..
وگام يقهقه وگبل ما أساله سؤال گمز وراح وما عرفت شنو قصته.. ؟؟
عنده گرايب بالمنطقة الخضراء !!
لو حبيبته ساكنة هناك !! ما لحگت أعرف ..
وراها أجا البعير وگف وگال أشگد أني صبور وشگد عندي قدرة أتحمل بس بصراحة ما أتصور راح أگدر أتحمل شكولكم وأفعالكم أنتو العراقيين وراح وعافني ..
ما أعرفت أجاوبه .. شأجاوبه !! هو أني منو گدرت أجاوب لهسه حتى أجاوب البعير ..؟؟!!
بعدين جتي الخرفان والصخولة والنعاج وكانت متعاطفة وياي وباوعت عليه بحزن وگالت بس أحنا اللي حاسين بيكم أنتو العراقيين ..
حالكم مثل حالنا ..
بالأفراح مذبوحين ..
بالأحزان مذبوحين ..
بالعصا منساكين ..
ياهو اللي يجي يحلبكم وبالتالي للدباغ يودي جلدكم ..
وگبل ما أفرح وأتعشم گالت بس أحنا ترى گلوبنا خلصانة وما بينا حيل نواسيكم
وراها أجاني الذيب يضحك وبكل خبث گال شلونك أستاذي ..
هالمرة جاوبت وگتله أني مو أستاذك .. أستاذك أهناك بالداخلية ..
أني رجال مسالم مالي علاقة بالذيابة والواوية ..
وراه أجتني الفيالة والزرافات والدببة وغيرها من الحيوانات ..
چان أصيح هوب على كيفكم خوب أنتو لا نعرفكم أحنا العراقيين ولا شايفيكم ..
چان يردون ولها السبب أحنا مقهورين ..
كل العالم بحدايقه مضيفنا وشعوبهم بينا معرفهه الا أنتو العراقيين زورائكم خرابة وحديقتكم فارغة ..
لا وچمالة مسميها ( رئة بغداد ) .. شلون رئة ؟؟؟!!
عبالك رئة واحد گاضيها جگاير لف ..!!
گلت بگلبي ماكو حل ما بقت غير طريقتنا أحنا العراقيين اللي متعودين عليها هي اللي راح تخلصني ..
خليت أيد على راسي ورفعت أيدي اللخ وگمت:
أهوس وها خوتي ها وچم بيت شعر مدحت بيهن الأسد وبأعلى صوتي كتله : بأسمي وبأسم جميع العراقيين ( من رخصتكم حچيت بأسمكم لأن أني متأكد أنو أنتو تعيشون نفس الطرگاعه اللي أني عايشها ) ..
وطلبت من الأسد يجي ويصير ملك علينا أحنا العراقيين ..
باوع عليه الأسد وصفن وبعدين چال :
لك أبني روح أني ما أفيدكم ترى أني لا عندي أنتخابات ولا ديمقراطية ولا عندي أحزاب وميليشيات ولا فدرالية أني شعاري الدكتاتورية .. أي أني الملك أبو الدكتاتورية ..
صحت بفرح وگلت والله شتاكينا للدكتاتورية ..
والله هي اللي راح تخلصنا من هالبلية ..
أحنا مو شكول أنتخابات ولا شكول ديمقراطية أحنا دوانا الدكتاتورية ..
گلي الأسد لعد أخذ طلبك وروح
رجعت وأني ما كاتلني وقاهرني الى هسه غير القرد ..
ليش كام يضحك لو بس أعرف!!!